دەستکەوتنی بامێ لە وەرزی زستاندا ئاسان نییە یاخود نرخەکەی زۆر گرانە، هەر بۆیە بەشێک لە کابانەکان بامێ لە وەرزی هاویندا وشکی دەکەنەوە و لە وەرزی زستاندا ئامادەی دەکەن.
پێداویستیەکان:
- بامێی وشک
- گۆشتی سور بەپێی ئارەزوو
- پێنج تەماتە
- دوو کەوچکی گەورە دۆشاوی تەماتە
- خوێ بەپێی پێویست
- زەیت
- دوو دەنک سیر
- یەک بیبەری تونی سەوز
- هاڕڕاوەی توێکڵی پرتەقاڵ یان قاشێک توێکڵی پرتەقاڵ
ئامادەکردنەکەی:
- سەرەتا گۆشتەکە دەخرێتە مەنجەڵێکەوە لەسەر ئاگر دادەنرێت تا کەمێک رەنگی ئاڵ دەبێت، دواتر ئاو و خوێی تێدەکرێت و سەری دادەپۆشرێت تا بەجوانی دەکوڵێت، ئاوەکەی دەگیرێت و دووبارە گۆشتەکە سوردەکرێتەوە.
- بامێکە دەشۆرێتەوە و دەخرێتە سەر ئاگر و ئاوی گەرمی تێدەکرێت بۆ ئەوەی زەرد بکرێت، نابێت زۆر بکوڵێت.
- تەماتەکان ورد دەکرێن و لە مەنجەڵێکدا لەگەڵ سیرەکە و کەمێک رۆن سور دەکرێنەوە و کەمێک خوێ و توێکڵی پرتەقاڵ و بیبەرە سەوزەکە و دۆشاوی تەماتەی تێدەکرێت، ئاوی گۆشتەکەی تێدەکرێت و بۆ ماوەی ١٠ خولەک لەسەر ئاگرەکە دەبێت.
- بامێکە دەپاڵێورێت و کەمێک ئاوی ساردی بەسەردا دەکرێت، لەناو ئاوەکەدا گۆشتەکەی تێدەکرێت، پاشان بامێکەی بەسەردا دەکرێت و ئاگرەکە کز دەکرێت و سەری مەنجەڵەکە دادەپۆشرێت.
- لەدوای کوڵاندنی لەسەر ئاگر دادەگیرێت و لەگەڵ برنج پێشکەش دەکرێت.
Comments
Post a Comment